(( عصفورتى ))
بحبك آه لكن فيكى شىء بيخنقنى
ف عز الفرحه يقلب ويزنقنى
عيونك أيوه سحرانى
لكن بترمينى وتنسانى
بنظره عين تفرحنى
وميت نظره بتجرحنى
وترمينى لاحزانى
وأنا م العشق بتحمل
لكن مش ممكن اتزلل
ولا أعيد العمر م الأول
ولا اضيع بإيدى عنوانى
بحبك بكل دقة من قلبى
لكنى منيش سلبى
أعيش العمر على كلمه
أتصبر بيها من غلبى
وأمنى الروح برجوعك
واموت في اليوم متين مره
لما أحس بخضوعك
ولا أشعر بطعم اللقمة
والميه حلوة تكون أو مره
إلا إذا كانت من إيدك وينبوعك
وبعد ده كله ف أحضان حبيب تانى القاكى
وياريته كان بيهواكى
لكنه بيتسلى وياكى
ولما يضيع جمال محياكى
وياخد ما يشتهى منك
هيرميكى وبجوعك
وتلقينى برضه فى طوعك
وأنا اللى فايتاه كما المسحور
ومركون ف انتظار الدور
وأنا الغلطان وأنا الندمان
وقفت في آخر الطابور
وسيبت للمشترى روحك
فارجوكى حبيبتى سامحينى
وساعدينى أكون إنسان
تحبينى بكل ما فيا من عورات
لا أنا طيار ولا قبطان
ولا ساحر ولا قرصان
أنا حيالله واد غلبان
لكن بالروح هيفديكى
ووقت الزنقه يحمكى
منش بياع ولا تاجر
ولا بعرضك راح اتاجر
لأنى منيش كافر ولا فاجر
أنا مخلوق من طينك
أموت قصاد دمعه من عينك
وفعينى اعينك واقفل عليكى الباب
ولا يشوفك وينظرك الاغراب
وكل همومك امحيها وتبقى سراب
وحلمى أعيش أنا وانتى
ياعصفورتى
كما كنا زمان أحباب
وتسكرى من خمرى وشهد رضاب
وانسيكى ما فعله أى غراب
ياعصفورتى
سعيد عباس الضو
ليست هناك تعليقات:
إرسال تعليق