((نداء وطن))
مسجون فيك ياوطن
والحيطان حراس
والقاضي هو جلادى
أما جريمتى من زمن
إنى ياناس حساس
مسجون فيك ياوطن
مع وسع ارضك
سجانى جاهل
وكرباجه مبيرحمش
ومهما أحاول
هو مابيفهمش
قالى جريمتك إيه
قولت خايف على
عرضك
لقيت صاحبنا اتفزع
ورزعنى كام كرباج
وقالى هناك اترزع
عامل لنا إزعاج
وطول ما إنت كده
عمرك ماهتشوف افراج
جريمتى إيه ياوطن
وأنا ابنك البكرى
شايل هموم الولاد
معاك من صغرى
وشعرى شاب ياوطن
قبل الأوان بدرى
وقلت في يوم
هتروق وتضحكلى
اتريك جايلى مكشر
ونافخ الاوداج
وطن وماشى بالمقلوب
الغنى تملى كسبان
أما الفقير مغلوب
من غلبه حيران
ومن الإرادة مسلوب
بيتعامل كما الجرذان
وحقه كمان منهوب
ملعون أبوه خسران
اللى يبات مرعوب
الحق دايما يبان
مدام تملى مطلوب
واللى ما يستره بيته
ما يستروش التوب
أرجع بسرعه ياوطن
من تانى إلى رشدك
نلملم بواقى الأمل
وناخد عليك عهدك
ونعالج اللى اندمل
بأيدينا في جسدك
ونرفع شعار العمل
ماهو قلته فسدك
وتبقى دايما معانا
ونبقى كلنا جندك
وبالعلم ويا الإيمان
هنعيد كمان مجدك
ولازم نبقى فاهمين
مالنا لزوم من بعدك
أفهم ياوطن كويس
إن إحنا بنحبك
لا يجى يوم ندوسك
ولا ف مره نسببك
ونعادى اللى يكرهك
واللى يحبنا يحبك
إحنا ولادك مهجتك
وهدية من ربك
آخر نصيحه وربنا
وياريت بس تفتكر
إحنا فى نهايه اسمنا
إنت تمللى تتذكر
حياتك ومرهونه بنا
شىء لايمكن يتنكر
العيبه تبقى وشنا
ولا حلوه إنت تتشكر
وإيه تعمل الماشطه
فى الوش العكر
سعيد عباس الضو
ليست هناك تعليقات:
إرسال تعليق