من غير كسوف
وكلام مكشوف
محدش يجيب سيرة زعل
لو تعملوا فيا معروف
بكرة خلاص طلع العيد
الحزن يمشى يروح لبعيد
وعيد الفطر ياخوانا
إن شاء الله ليكو يبقى سعيد
محدش يفكر في الفلوس
واصحوا بقى م الكابوس
وكله يفرد لنا وشه
وبلاش بقى تبقى موكوس
من الهموم خدلك هدنة
مش فارقة لحمه أو جبنه
الاكل عمره ما بيسعد
والكلمه ممكن تتعبنه
ياغاوى الهم أبعد عنا
أنا خلاص مش هستنى
مش هقعد أيدى على خدى
ويجينى كل ما أتمنى
الفرحة محتاج تخطفها
زى ورده هتقطفها
مفيش جوازه تبقى تمام
لازم تعاينها وتشوفها
هات السعادة من وسط سحاب
زى القمر ف قلب ضباب
مش تفضل قافل على نفسك
وهى تجيلك لحد الباب
عيدكم مبارك يا سادة
إحنا اتخلقنا لعبادة
والفرح مذكور في القرآن
ياريت تخليه بزياده
ربنا يسعد اوقاتكم
ويخللى صبيان وبناتكم
والفرح يملا حيطان البيت
ويهدى كمان زوجاتكم
سعيد عباس الضو
ليست هناك تعليقات:
إرسال تعليق