((حروف مخنوقه ))
وليه ياحروفى تعبانى
معندانى وألمانى
تكون الكلمة
على لسانى
وتهرب زى قمر الليل
فى وسط سحاب
وأنا من طيبتى
أو من خيبتى
أقول هترجع تانى
اتاريكى نسيانى
وعامله زى
سنين العمر
اللى يروح ما
يرجعشى
ونفس الامر
نخل التمر
من غير تلقيح
ماينفعشى
وأنا الجاهل بأفعالك
يقولولى؟
ومسمعشى
ادارى الحزن ف عنيا
ولا ادمعشى
أموت ب سكوت
ولا اصرخشى
أخاف صوتى يأذيكى
واتاريكى
ياحروفى مجزوعة
وموجوعه وممنوعه
بأمر الحزن
همستيلى وقولتيلى
بكل خشوع
وإيه تفيد الكلمه
في زمن جربوع
وناس ماشيه
ف الممنوع
وناس تتعالج
من التخمة
وناس تانيه تموت
م الجوع
سكت وما لاقى
اى جواب
دفنت ف قلبى
كل عذاب
لكن فجأه جانى
حروف
وظهروا ليا
ع المكشوف
وقالوا أعمل فينا
معروف
أكتب بلاها
كسوف
تموت راجل
فدا الأوطان
أفضل ما تعيش
بالخوف
سعيد عباس الضو
ليست هناك تعليقات:
إرسال تعليق