بياع السعادة
على قهوة باشربها سادة
بيعدى بياع السعادة
وقلت له عبى لى فى شوال
من الصحة يعنى وراحة البال
ضحك وقال لى اكيد غلبان
راح تشتريها بكتر المال
ولا بأرض وكم فدان
وقلت له صاحبك فقران
ادينى حتى نص شوال
لعيلتى يعنى وللجيران
اسعد وأجيب ده لغيرى كمان
فدان سعادة وخير وسلام
قام قال لى حكمة فى الأمثال
اصل السعادة رضا وإيمان
وبدون لا شكوى ولا استسلام
والكون ده مخلوق كده بميزان
وكله مكتوب بميعاد وأوان
وصاحبه لا بيغفل ولا بينام
خالق عظيم وكمان رحمن
لو فى ده شعبة من الإيمان
الحال حيتغير فى الحال
أنت فى نعمة وخير وسلام
تحس بيها بفقد الحال
وتتمنى ترجع زى زمان
وتقول يا ريتنى وكنا وكان
اصل السعادة لبنى الإنسان
فى الحمد دايما والعرفان
ورضا بمحبة للاحوال
وقلت له معلوم وتمام
وجيبت له كوباية شاى
مع شيشة حمى وباكو دخان
وعزمته على فول بزيادة
وكيس فلافل بسعادة
وسألته يعنى إحساسك ايه؟!
لو كلت بدل الفول ده بانيه
ضحك وقال لى يا إبن الايه
بالصحة تهضم دولار وجنيه
و قال لى دايما كالعادة
حاجى وأبيع لك السعادة.
مع تحيات الفقير إلى الله
ياسر شرف
كبير محررين مترجمين
باتحاد الاذاعة والتلفزيون
ليست هناك تعليقات:
إرسال تعليق