((( نهار )))
زمان كان النهار بيجى عندنا
يفرش النور على الأرض
ويلم البنات مع الصبيان
يحكى حكاوى جميله
وساعات كان يستغطى
كمان وينام
كان النهار قلبه زى الحديد
ما يخفشى م الليل البعيد
كان بشوش زى يوم العيد
وكان عن الحق ما بيحيد
إن قال مابيعيد
ولا بيتدارى ف شويه جريد
ولا كل إيد ترعبه
ولا كل نظره عين تتعبه
ولا كل كلمه تغير أفكاره
ولا بالهموم ينكوى بناره
وكان نهاره صابح
وليله من الخوف رامح
وكان تملى يسامح
دلوقتى بقى الليل
بيجى ف وسط النهار
يخللى النهار ينهار
معرفشى إيه اللى جرى
بسال وقول ياهل ترى
الليل على وشوشنا قرا
سطور الحزن مكتوبه
ولا الآيه مقلوبة
ولا النهار شاف
الكذب ف التوبه
ولا الدعوة مضروبة
ومصحوبه بنزوه شيطان
ليست هناك تعليقات:
إرسال تعليق