((اغنية مستنيك ))
مستنيك أنا مستنيك
مستنيك على شوق
تاخد قلبى لفوق
وتهذبنى وتادبنى
وتخلينى أحب الغير
مستنيك أنا مستنيك
مستنيك على شوق
زى الطير
تصحى تزقزق
لما الفجر بيجى يشقشق
تطلع تبحث عن ارزاقها
راميه حمولها ع اللى خلقها
ترجع تانى ماليه بطونها
بكل الخير
مستنيك أنا مستنيك
مستنيك على شوق
زى القمره
ماتجى فعز الليل
تملى قلوبنا بالانوار
والعاشقين هيقولوا أسرار
يملوا حياتهم بالأفكار
يحسوا ببرد ف عز النار
ولسعه حر مع الأمطار
مستنيك أنا مستنيك
مستنيك على شوق
زى ورود فى ربيع
يجى يفتح للى يصبح
يفوح بعبيره للى يزوره
يبهج لونه للى يصونه
كل عبير محتاج تفسير
حجم صغير حجم كبير
فيه الشوك والورقه حرير
مستنيك أنا مستنيك
مستنيك على شوق
زى المطره
متنزل قطره بقطره
تخلى الأرض البور
تطرح فيها زهور
يشرب بلبل مع عصفور
تملى عيونها النور
والكروان ويا الشحرور
يملو الدنيا أغانى سرور
مستنيك أنا مستنيك
مستنيك على شوق
زى الفجر
ما يجي برزق الناس
للى يقوم بحماس
يشيل على كتفه الفاس
حافى أو بمداس
يزرع غله أو أناناس
يبقى رزقه الماس
وحظه كمان هيفوق
مستنيك أنا مستنيك
مستنيك على شوق
سعيد عباس الضو
ليست هناك تعليقات:
إرسال تعليق