بالأحكام مصريه
وبالأعراف مصريه
والدم اللى سال على ارضها
عمره مايبقى ميه
لو كنتوا ناسين التاريخ
هاتوا الكتاب واقروه
أكم شهيد على أرضها دفنوه
ياجندى يامصرى
ياللى اندفنت هناك
أقسم برب الكون
أمك ماهى نسياك
ولا احنا كمان ننساك
وإن كانوا أهلك باعوك
ربك هيتولاك
وألف عين غير عيونهم
حالفه تشوف قبرك
صبرك عليا
حالف بعهد الله
وبالدم في عروقى
طول ما في عينى ضى
يا إما أجيلك حى
يا إما أموت وياك
الأرض دى أرضى
وحته من جسدى
روحى فدا عرضى
إنا مكانك هنا طول
ماأنت حر طليق
وساعة الضيق الآخرة
تبقى معاك
انسى انى أبيعك يوم
أو حتى أفرط فيك
دا كل ذره رمل
داستها رجليك
فداها مليون روح
الروح تهون علينا
وإنت ماتهونشى
وإن كان هناك خاين
إحنا منخونشى
واللى مايشفشى م الغربال
يبقى أكيد أعمى
إقرأ كتاب التاريخ
تانى سمعنا إيه معنى
إنى أبيع أرضى
لجل لقمه عيش
اربط على بطنى حزام
وأعمل لبوقى لجام
أموت أنا بكرامه
أحسن ماأعيش متهان
ولا يدوس ارضها
أى جبان
لا عاش ولا كان
ولا هيكون
دا إبن مجنون اللى يفكر
يبيع أرضى طول مافى
جسدى روح
سعيد عباس الضو
ليست هناك تعليقات:
إرسال تعليق