دقدق الحداد
======
انا اسمى دقدق الحداد
مولود كبير بين الاولاد
وليا عشرة من الاخوات
محشور مابينهم انا بالذات
وابويا غلبان قوى وضعيف
وامى تخلف كل خريف
والعيشة صعبة وضنك كمان
والفقر موصوف لى بعنوان
نزلت اعيط باستسلام
وقدرى مطرقة مع سندان
وطفولتى مطروقة بحديد
والجلد محروق كده عالايد
لازم اساعد فى المصروف
واجيب لابويا عباية صوف
واخواتى ياكلوا بس منين
وامى مريضة وابويا مسكين
سرقوا طفولتى واحلامى
وزرعوا رجولتى والامى
باحسد زمايلى واصحابى
على عيشة ناعمة ياخرابى
عالمدرسة رايحين جايين
وانا اللى عيشتى زى الطين
والنار بتكوى حديد وحنين
سبقت سنى سنين وسنين
وطفولتى شاخت ولسه صغير
حتى الحديد ده ساعات بيلين
وطفولتى صعبة وفيها مسامير
مش ذنبى انى صغير وفقير
وابقى فى طفولتى كبير وحزين
ده ذنب اهلى بدون تعليم
والمجتمع ظالم شرير .
مع تحيات الفقير إلى الله
ياسر شرف
كبير محررين مترجمين
باتحاد الاذاعة والتلفزيون
ليست هناك تعليقات:
إرسال تعليق