يوميات حسين وفتحية
حلقة الثوم
=============
صباح الخير يا عم حسين
ياورد مفتح على الخدين
صباح النور يا ست فتحية
يا وردة الامة العربية
ليكى فى تفسير الأحلام
طبعا أكيد قول لى ياسلام
حلمت انى بااكل فول
بزبدة يعنى وفصين توم
ونفسى يعنى الحلم قوام
يبقى حقيقة اكيدة فى الحال
بتقول حقيقى فصين توم
يبقى حتبقى صحيح مجنون
التوم غلى والسعر ده نار
كفاية تاكله بالزيت الحار
عشان ده حلم اتغطى كتير
واحلم على قدك يا فقير
يا ولية كفاياكى تخريف
التوم ده كان ارخص بكتير
وكان زمان اكل الحرافيش
ايه اللى غيره كده يالطيف
طب هاتى توم أبيض صينى
ارخص من البلدى يا عينى
ده كان زمان قبل التعويم
لجنيه بيغرق فى المواسير
ودولار بيطلع ليل ونهار
ومفترى وحيخش النار
يا ولية طشى الملوخية
وكفاية شكوى يا فتحية
تحلم يا خويا بفصين توم
ابقى اتوكس كده قبل النوم
وازاى نخلل فى بتنجان
والتوم غلى وبشكل جنان
لا فى بصارة ولا بتنجان
كفاية لحمة وكفتة تمام
بتسخرى منى يا فتحية
يا توم مصنن مع تقلية
اعمل لك ايه والخيبة قوية
لا فلوس تقضى للطعمية
او حتى رومى للملوخية
اوعاك ما تحلم تانى بالتوم
لا يقولوا مسرف او مجنون.
مع تحيات الفقير إلى الله
ياسر شرف
كبير محررين مترجمين
باتحاد الاذاعة والتلفزيون
ليست هناك تعليقات:
إرسال تعليق