آلم وأمل -- بقلم \ أحمد السحراوى

مسكت إيديا القلم
عاوز أبوح بالألم
إللى فى قلبى سكن 
وفى العروق إتكتم

عاوز أقول كلمتى
وافرد شراع غنوتى
وامسح دموع دنيتى
إللى عليها إترسم

عاوز أطير فى الهوا
وأقطع حبال الجوى
وأجيب لقلبى الدوا
وأشوفه تانى إبتسم

عاوز أداوى الجراح
وانسى إللى عدى وراح
وابدر تقاوى السماح
تطرح محبة وعشم

عاوز أساعد واعين
ماسألش إمتى وفين
والرب هو المعين
رازق عباده النعم

عاوز أزيل الهموم
وازرع أمل كل يوم
والإبتسامة تدوم
تبقى لحياتنا علم

عاوز حياتنا نشيد
بنردده ونعيد
يطلع بفجر جديد
يصحى فينا الهمم

عاوز أعيش الحياة
راضى بحكم الإله
عاشق لخلق الله
كلى شهامة وكرم

بقلم \ أحمد السحراوى