ليس شعر وإنما رؤيه حقيقيه
من صلبك أنا مولود
وبحبك كمان موعود
ولو عوزتنى ف الزنقه
لبيتك هتلاقنى عمود
عشانك اتحملت كتير
لدرجه كلت لحم حمير
ولو شاورتى بصباعك
فلحظه تلتقينى نصير
عايش فيكى فقير الحال
مفكرتش فيوم فى المال
لكنى فى وقت الشدة
على العدا أكون زلزال
من كتر ما لقونى موجوع
فاكرينى يا ناس جربوع
وعلى الممنوع يراودونى
أقسمت لو هموت مالجوع
يبان الأصل في الزنقه
تعيش العمر فى خنقة
أفضل ولا تعيش ضايع
مشرد بتدور في حلقة
وطبعا ليا عليها حقوق
أتعامل كمان بالذوق
وزى زى اى وزير
وحقى مهوش مسروق
يكون العدل بينا ميزان
لا دا إعلامى ولا فنان
الكل يكون سواسية
وهتكون ولا البستان
أنا مش بتكلم على أحلام
دى رؤيه وربنا العلام
كلام بقوله من قلبى
عشان نعيش كلنا بسلام
البلدى مش بلد أشخاص
وأنا حيالله هنا قرطاص
وراح نبقى كلنا عيونها
ولا واحد يكون بصاص
نعاهد الله ناخد ايدها
ولو زعلت نكون عيدها
ونبنى بلدنا من تانى
ونبقى طوبها وحديدها
سعيد عباس الضو
ليست هناك تعليقات:
إرسال تعليق