(( صوت حبيبتى))
صعبان عليا صوتك المدبوح
وأنا واقف قليل الحيلة
وانتي بطلعى في الروح
وأنا ايدى قصيره
وعينى بصيره
لكن اللى مصبرنى
إنى شايفك مستسلمه
للجانى
وانا اللى جانى مرض
من كتر شيل همك
وإنت ولا همك
ما هم كتار حواليكى
إن مت أنا أو ألف
مين زيى
بنظره منك
أو بسمه من فمك
هيجيلك بدل الحبيب
مليون واحد تانى
وأنا اللى كنت فاكر
إنى أنا الجانى
وأنى أنا اللى مقصر في حبك
ومش قادر احميكى
طيب دنا كنت ف عنيا مخبيكى
وكنت شاريكى
لما الملايين
باعوكى
وضهرى كان قنطرة
لما انهرا
من دوس رجليكى
وراح شبابى هدر
ف خدمة معاليكى
واللى غدر بيكى
أهو شارب
عسل صافى
وياريتوا كان كافى
دا كان عليكى متعافى
وكان عنيد وبيجافى
وناسى انه في يوم
إنه كان حافى
ولولا طيبه قلبك الدافى
وحبى ليكى ياغاليه
لكان ولا عاش
ولا هيعيش
ولا ثانيه
اللى يخللى دموعك
ع الخدود جاريه
وصوتك الكروان
اللى ياما زمان
بهمسه منه
تتحمى الأحزان
والطير عشانك يغنى
أعذب الألحان
النهارده صبح صوتك
خلاص موجوع
لا طالع ولا مسموع
بتموتى م الجوع
ولا الحبيب حاسس
ف يوم بيكى
سعيد عباس الضو
ليست هناك تعليقات:
إرسال تعليق