امبارح
يجى الساعه 2
بالليل
قلبت شوية
حاجات
م اللى فات
لقيت 3
حاجات
عمر اتسرق
وقلب مكسور
ووجع بالكوم
وعصفور
غاوى حبسه
انا من مواليد
النكسه
والنصر
تصدق
24/10/66
دا تاريخ
الميلاد
والباقى كان
سرسبه
لسه فاكر
مسلسل
كونتا كينتى
ومارد الجبل
واحلام تعبت
م الحبل
حمل كاذب
وكل اللى
ماتوا
فى الشارع
كانوا معايا
امبارح
عمك فرج
وخالتك روضه
وابوك عامر
وعم فتحى
وابويا السيد
وابويا مسعد
وابويا فتوح
والحاج محمد
وابوه
وابويا محمد
وعمك عطا
وابويا
اللى وحشنى
اكمل
والا بلاش
قطن وشاش
وايام الفرقه
والدوره الخامسه
وعم محمود
ابو خليفه
اللى كنت بشك
ان ليه عنين ورا
وحامد سلطان
وابو العلا
وناصر الدقدوسى
كان الرادار
بتاع الفرقة
والطياره الورق
والخيط البزار
والبيوت النى
كاتم للصوت
وكان الدفا
فى اللمه
والحلم كان بيكبر
فى لمبة جاز
والراديو
يادوب
الشرق الاوسط
وصوت العرب
واذاعة القران
والشيخ كمال
كان بيطول قوى
فى صلاة الفجر
لحد م الناموس
يمص دمنا
كام سنه
تعبت م العد
يأجوج ومأجوح
اكلوا السد
والباقى
طلوع الروح
انت باين عليك
خرفت
زى الساعه
الاورينت
اللى ابوك
اشترهالك
بعد ما باع الارض
ومات ..........
شعر
اشرف الشناوى
البرامون
ليست هناك تعليقات:
إرسال تعليق