شاعرة اسكندريه علياء امير
عزيزى ؟! .. كلمه رسميه
حبيبى ؟! .. كلمه مش ليا
فـ خد احساسى بالنيه ..
و شوفلك إسم أو حدد
طريقه أكلمك بيها
" انا البنت اللى حبت شخص
و عارفه بإنه مش ليها "
رميت نفسى فـ بحر عنيك
لقيتنى سفينه بتعدى
وشوفت الطرحه و الفستان
و قسيته لقيته مش قدى
جريمه حب متاكمله
لكن من غير دليل مادى
بحبك بس صعب أقول
بشوف باب الحنين مقفول
و برضه اديا بتخبط
و بتربط بحبل الشوق
بموت بهدوء ..
ويوم عن يوم بقيت
بدبل و بقبل و ضع مش حباه
بحاول أجمل المآساه
و أقول يمكن ..
و أقول جايز
ومين عارف
يجوز الوضع يتغير
و أعشم نفسى بيك أكتر
و الأقى انت أصلا حلم
و انا البطله اللى مش ممكن
فـ يوم هتشاركه نفس الفيلم
و إن السكه مش واحده
عشان انا و انت نتشارك
وفـ الآخر هكون واحده
هتيجى فرحكوا و تبارك
ولفت دايره مقفوله
عشان حبت و متحبتش
جواب من بنت مجهوله /
بتكتب بس مبتبعتش !!
ليست هناك تعليقات:
إرسال تعليق