((شاعر))
قاموا عليا ب هيصه
قالوا سلعتك رخيصة
فاكرنى بياع هريسه
ولا شايل فراخ ف تقفيصه
ولو يعرفوا سلعتى أهم م البنا
واللى يمشى ورايا دايما يتهنى
وسلعتى تملى
تنقذ من النار
وتدخل الجنه
احسن من الفارس
دافيه ف شتا قارس
ونسمه ف حر مارس
زى حضن الأم
تشيل الهم
تشفى م السم
ماتعرفش هدم
مش فحت وردم
ساعات تكون أزهار
عبيرها فواح
مسا وصباح
وسيف بتار
على الأشرار
وع الفجار
وساعات تكون حكمه
وسيول م الرحمه
ف وسط زحمة
منديل لناس عرقانه
مرهم لأيد شقيانه
سحابه لناس تعبانه
مكتش ف يوم جوعانه
وصعرانه وهمدانه وخيبانه
سلعة م السما السابعه
من القلوب نابعة
ومش تابعه ولا قابعه
في بير مظلم
ممكن حرفها مؤلم
نقول ف العلم فيه اعلم
ياسلعتى ياسلعه الأنبيا
والصحابة والأوليا
انا سلعتى كلام
عالي المقام
صاحى أو بتنام
لك عندى حدوته
معدوله ومظبوطه
كيكة وبسكوته
مكتوبه ومخطوطه
ساعات في شكل الأب
تهب وتدب وتسب
لكن ب تربية
قسوة ب حنيه
ساعات تبقى صديق
تلقاه ف وقت الضيق
تحكي له اسرارك
تاخده ف مشوارك
ف الضلمه انوارك
مرات تختلفوا
بسرعة تأتلفوا
مفيش غنى عنه
ف فرحه وف غمه
أحيانا تشوفها حبيب
وتسهر لها بالليل
وتبقى منها قريب
وتسقيك الويل
وساعات تكون جافة
تجرى وتتكفى
والناس تتشفى
لكنها عفة
مفيش وراها عار
وكلها أفكار
بحور وانهار
ورود مع أزهار
قالوا في الأشعار
ترفع حطان الدار
شاكوش مع مسمار
ازميل ف إيد نجار
حاله من الإعصار
حداد يفوت ف النار
انا سلعتى كلمه
وكلمتى بميزان
ف السما نجمه
وف الارض رهوان
قاضى بالحكمة
والحكم للرحمن
عرفتوا إيه سلعتى
وإيه تكون صنعتى
أنا صنعتى شاعر
حساس وكلى مشاعر
لكن على قدى مش واعر
سعيد عباس الضو
ليست هناك تعليقات:
إرسال تعليق