((((( نهاية حب)))))
يا حبيبتى خلينى أقول لك
زى ما قال لى هيقول لك
متصدقهوش
نفس المكان هنا
نفس الترابيزه
هنا ع الكورنيش
والكرسى الفاضى اللى ف ريحك
كان فيه ريحتى قبل ما تيجى
ولا يعرفكيش
نفس الكلام اللى سمعتى
أنا زيك بودانى سمعته
فمتنخدعيش
وبرضه أكيد يمكن شفتى
كام دمعه ف عينه
وأكيد وراكى القمره وتهتى
وسقاكى من شهد كلامه
وبلمسه ايده على ايديكى
يمكن دوختى
وأكيد قال لك انا شايف الكون ف عنيكى
والدنيا بترقص حواليكى
ولاخر يوم من عمرى متمسك بيكى
وزرعلك بساتين احلام
وغزلك م النسمة الحلوه
يجى كام موال
وبنى لك كام قصر خيال
وسمعتى معاه يجى كام
غنوه
بتحكى عن جرح حبيب
وساعتها تلقاه هز دماغه
وقال لك دا حد غريب ؟
وأكيد وأكيد
مخلفش معاكى المواعيد
انا آسفه مضطره اسيبك
لأنه دلوقتى راح يجى
يمسك إيدك
ويحاول يعمل تعبان
ويقولك سامحينى مش قادر
وبشكله المرعوش هيبان
انا اسف مضطر أسافر
من اصلى شربته من
قبلك بزمان
سعيد عباس الضو
الخميس 27 أبريل
12:58
ليست هناك تعليقات:
إرسال تعليق