..... أنا بعشق مصر ..... الشاعر مصطفى العيادي

..... أنا بعشق مصر .....

النيل سارح ف الغيطان ..

والصبح طالع من زمان ..

والحب .. ف قلوب التعبانين ..

والصحبة .. مع ناس فرحانين ..

عشان كده .. أنا بعشق مصر ..

. * * * 

ومصرية .. ماشية ف الحارة ..

حواليها .. يحموها الرجالة ..

تصبّح ع الكل .. بسلامتها ..

والضحكة ملياها .. بحلاوتها ..

عشان كدة .. أنا بعشق مصر ..

. * * *

يا سلام على شاي .. ف الخمسينه..

وصحاب .. فى القهوة تسلينا ..

يوماتي .. بعد الشغل .. يقابلونا ..

والقعدة تحلا .. بعد العصر ..

عشان كدة .. أنا بعشق مصر ..

. * * *

أدان للفجر .. يصحينا ..

وأجراس كنيسة .. حوالينا ..

نتمنى دايما .. يومنا سعيد ..

ونصحّي بعض .. ده بكرة العيد ..

عشان كدة .. أنا بعشق مصر ..

. * * *

وأروح .. واخواتي .. للسيما ..

من ستة .. لتسعة .. تقضينا ..

ونحكي الفيلم .. لبعضينا ..

ونام .. ونهدا .. بعد الفجر ..

عشان كدة .. أنا بعشق مصر ..

. * * *

أيامنا حلوة .. بأهالينا ..

وإيدينا مع بعض .. تعدينا ..

والفرحة .. دايما .. تحمينا ..

وغنوة تقولنا .. هية دي مصر ..

عشان كدة .. أنا بعشق مصر ..

( مصطفى العيادي)