هو المنسي اللي مبينساش
هو الحي اللي عمره معاش
هو اللي على الهامش و متهمش
هو اللي مهما يحصله
بيقول عادي و ميهمش
هو اللي اخدوا احلامه
حبسوها فزنزانه كمان ضلمه
و كل ما تحاول يوم توصل
يقوموا ضربينها بالصرمه
قال الصبر للفرج مفتاح
فسكت منطقش و لا كلمه
صعب عليهم يعيش مرتاح
غيروا الكوالين ولاد الهرمه
هو اللي وطى لاجل لا توطي
و شال عنك هموم ياما
داس على وجعه قال خطي
خطيتي و رمتيه وسط دوامه
كل مواصلاتك مش بتوصل
و مها عافرت مش راح افوت
الحزن عليا متفصل
و كل تذاكرك تذاكر موت
هو اللي جاب البذره
بوروا طينه
هو اللي قال الفكره
كفروا دينه
هو اللي شاف السكه
سدوها
هو اللي حب البنت
قتلوها
هو اللي بيندهلك
و مش سمعاه
هو اللي رغم وسعك
مش سايعاه
هو اللي وسط الصوره
و مش شايفاه
هو اللي برغم اللي قاله
لسه مش عارفاه
ليست هناك تعليقات:
إرسال تعليق