ملعون ابوها مصلحة
النبته في أرض البوار
متشتتة
والحالة لسه مزفِّتة
والصيف يخبط ع الشتا
تحت السما من غير غطا
على مين هترسى يا عطا؟
مين يشتري؟
جتت الغلابة المقهورين
ويبيع لمين؟
ممبار وكلية وفشته؟
كل الديابة غشته
الموت معشش عشته
والفقر ساكن مشيته
ف درا الحيطان متظبطا
على مين هترسى يا عطا؟
نخاسه لسه مكلفته
مركب خشب كات دفنته
والملح فتت جتته
شايف ملامحه وسحنته
كان نفسه دنيا مظبطه
كان نفسه ينهي اللخبطة
والبحر بيشده لغريق
سحب البساط توَّهْ طريق
ما كفاش سنين المرمطة؟
الحلم في حضنه اندفن
حضنه ونام جوه الكفن
يا دنيا نَخْورْها العفن
زغللتي عين الميتين
هنقول لمين
ونقول لمين؟
ملعون أبوها مصلحة
دنيا وغاوية المرجحة
بعتانا حبل المشنقة؟
ولاّ برود المشرحة؟
سامح لطف الله
ليست هناك تعليقات:
إرسال تعليق