ليالينا الحلوة- الشاعرة والأديبة سامية سليمان

ليه جي وناوي علي رحيلك 

من قبل ماجيت
نوَّرت الدنيا بقناديلك
عمَّرت البيت
دي قلوبنا للقاك اشتاقت
من يوم مامشيت
ولا مرَّة بتخلف مواعيدك
ولا مرة نسيت

بتخضَّر أيامنا الجافة
وتبل الريق
توعدنا تحقق أحلامنا
والحلم بريء
والدنيا علي عهدك شاهدة
والنصر حقيق
وحندخل بهداك الجنة
من أحلي طريق

وتعدي ليالينا الحلوة
ف عبادة الله
وقلوبنا للخير متسابقة
وعشمنا رضاه
والخاسر اللي بيحسبها
سهرة وملهاه
ماينوبه غير عطشه وجوعه
وغضب مولاه

ربنا ح يبارك أموالك
لو تدِّي فقير
ماهو زوِّد فيها علشانه
له حق صغير
لو ياخد حقه لا ح يشكي
ولا يوم ح يغير
ويبارك ربك ف حياتك
والمولي قدير

إيه يعني ح نجوع أو نعطش
ماهو فيه ملايين
العمر بحاله عطشانة
وكتير جعانين
خلينا نحس بأحوالهم
ونراعي الدين

سامية سليمان