كمل ..
إن كان بشر .. واللا حاجات
لو كان كلام .. أو كان سكات
إن كان غريب .. أو ليك قريب
عادي حتى .. أو شئ عجيب
خُد حلاوته .. والباقي سيبُه
واللي يسقط .. ما توطيش تجيبُه
وإمشي الطريق .. لحد الغايات
مين اللي فينا .. ماقالش آه
ومين ما انكسرش حاجات جواه
هو كده طبع الحياه
تدي الثواني .. وتاخد ساعات
إن عشت قصه مؤلمَه
خليها عليك متندمَه
وخللي حكاياتك مُلهمَه
للجاى .. وعدي عاللي فات
ها تنسى .. وتحلم .. وتضحك كتير
على حلم حاصرك .. وخلّاك أسير
كمل حياتك .. قوم .. وسير
ولاترضى أبداً .. بالفُتات
وإيه يعني حلم .. راح ومات
إحلم كمان .. لغاية الممات
ولاتبكي يوم عاللي إنسكب
مش هاتغير .. قدر إنكتب
حلمك معاك .. هو الصديق
وخلّلي أملك نور طريق
يشُق الضلام .. وإمشي بثبات
أشعار .. محمدعلي النقلي
حقوق الشاعر محفوظه
مسجله بالشهرالعقاري والحمايه الفكريه
ليست هناك تعليقات:
إرسال تعليق