متخافيش يا مصر علينا
متعودين نضحك والدمع في عنينا
متعودين نتبسم وقت السلام
قبل الكلام
نظهر الفرحه والهم مالينا
متعودين نحترم الظالم
وبالتحيه نرفع ايدينا
فمتخفيش علي زعلنا
احنا بنتولد والحزن فينا
شعبك خلاص بطل يحلم
وردنا كله الله اعلم
الله اعلم هتتغيري ولا لاء
الله اعلم يحكمك عادل ولا لاء
عايشين حياتنا فيكي بالزق
وامتي يعلي فيكي صوت الحق
اطمني عايشين ومش بنمل
وادمنا فيكي الاهانه وعيشه الزل
وانا راضي مانا مش ارجل من الكل
تعالي شوفي شعبك ازاي بيتهان
انا اخبز وغيري ياكل وانام جعان
علموني اسكت علموني اعيش جبان
لما شفت واحد بيتضرب قدام ولاده
لما شفت واحد بيعروه قدام مراته
لما شف بتوع الحريه ملو السجون
الشريف يموت والخاين ماسك القانون
شفت دباباتك يا مصر بدوس علينا
شفنا اخواتنا واصحابنا بيمتو قدام عنينا
شفت علشان رفعنا علمك اتقطعت ايدينا
شفتك دبيحه بياكلو لحمك ويرمو العضم لينا
فاطمني عايشين يا مصر من غير ما تسألينا
شفت جسه شهيد عفنت قدام امه وقدام ابوه
مش قادرين يجبو تصريح دفن عشان يدفنوه
دكاتره ومهندسين علي القهاوي قله وظايف
طفل واقف قدام مطعم عايز يقول جعان بس خايف
ام ل 7 اطفال فارشه في شارع بتبيع خضار
وام عشان تطبخ لعيالها بتلم عضم عند الجزار
وناس بتشحت من الفقر بتلف الشوارع طول النهار
فاطمني يامصر اتعودنا نقول بخير وعيشتنا مرار
اتعودتنا يضربنا الظابط منرفعشي عينا فيه
اتعودتنا الحاكم يسرقفنا ونهلله ونسقف ليه
اتعودتنا نشوف اطفال تأكل الاكل اللي بنرميه
اتعودتنا علي الخيانه وخاين الوطن هوا اللي حاميه
قلم. محمد سالم
ليست هناك تعليقات:
إرسال تعليق